Video av hendinga registrert frå Ørsta og Gaustatoppen:
Norsk meteornettverk.no | CNN.COM | BBC.COM |
Ein meteoroide frå verdsrommet dundra inn i jordatmosfæren i 19.08-tida laurdagskvelden den 19. november 2022. Det var ein bit av komet 2P/Encke som brant opp i møte med jorda sin atmosfære, stjerneskotet som lyste opp himmelen var tilhøyrande den årlege stjerneskotsvermen dei Nordlege Tauridene.
Så lyssterke stjerneskot vert gjerne kalla bolider. Boliden var synleg over store delar av sør-Noreg. Mange som var ute denne kvelden fekk seg eit lyssterkt minne for livet.
Meteoroiden kom inn i jordatmosfæren med snøggleik på 31,1 km i sekundet, og hadde ei masse på ca. 50-100 kilo. Storleiken på objektet var omtrent som ein badeball. Fordi det dreier seg om kometrestar var objektet ein miks av is, stein og grus.
Boliden gløda frå 119,8 km over jordoverflata til han var utbrent (slokna) 64,5 km over jordoverflata vest for Florø. Denne hendinga førte dermed ikkje til meteorittar på bakken.
Norsk meteornettverk har fleire kamera(stasjonar) over heile landet. Boliden laurdagskvelden vart registrert av to av dei. Eit på Gaustatoppen (samarbeid mellom Gaustabanen og Norsk meteornettverk), og eit i Ørsta (samarbeid mellom underteikna og Norsk meteornettverk). Informasjonen ovanfor er basert på Norsk meteornettverk sine analysar av observasjonen.
(Tekst: Geir T. Birkeland Øye)
